العبث الكروي: واش الاتحاد السنغالي باغي يربح الوقت ولا غارق في “التخربيق” القانوني؟
شتوكة تيفي _ مصطفى رضى
فضيحة قانونية جديدة كتحبس الأنفاس في الساحة الكروية الإفريقية، بطلها هاد المرة هو الاتحاد السنغالي لكرة القدم.
- إعلانات -
السنغاليين سقطوا في واحد “الخطأ استراتيجي” بدائي، كيبين بلي كاين تخبط وعشوائية كبيرة داخل الإدارة ديالهم، والقصة وما فيها هي “البلاغ المتناقض” اللي خرجوا بيه للرأي العام.
الاتحاد السنغالي علن على عقد ندوة صحفية غدا الخميس، والهدف منها حسب زعمهم هو “شرح الأسس القانونية” اللي غادي يعتمدوا عليها باش يرفعوا القضية لمحكمة التحكيم الرياضي (الطاس).
لحد هنا، الأمور كاتبان عادية.. ولكن، “الشوكة” فين كاينة؟
في نفس الوقت اللي كيقولوا فيه غادي يشرحوا الأسس، مشاو دفعوا طلب لـ “الطاس” كيطلبوا فيه تأجيل مهلة تقديم مذكرة الطعون!
وعلاش هاد التأجيل؟ قالوا ببساطة: “مازال ما عندناش الأسباب الكاملة والحيثيات ديال قرار لجنة الاستئناف”!
السؤال اللي كيطرح راسو: آش غادين تشرحوا؟
هنا كيجي التساؤل المنطقي اللي كيدور في بال أي متتبع: إيلا كنتو أصلا مازال ما توصلتوش بالحيثيات وما عندكمش الأسباب القانونية الكاملة، فشنو غادين تشرحوا في الندوة الصحفية ديال غدا؟
واش غادي تبيعوا الوهم للجماهير؟ ولا غير باغين “تبردوا” السوق وتديروا البروباغاندا؟ المنطق كيقول: يا إما عندك الملف واجد والأسس باينة، يا إما ما عندك والو وراك غير كترقع.
هاد التناقض كيبين بلي الإدارة التقنية والقانونية ديال الاتحاد السنغالي كتعيش حالة من “الفوضى”. هاد التخبط كيوحي بلي كاين ضغط كبير عليهم، وبدل ما يخدموا بـ “الرزانة” والقانون، طاحوا في فخ “التبرهيش الإداري”.
اللي كيدير ندوة صحفية باش يشرح “قضية قانونية” وهو مازال كيتسنى “الأوراق” ديالها، كيتسمى غير كينقز في الظلام.
الخلاصة: الاتحاد السنغالي حط راسو في موقف بايخ أمام “الكاف” وأمام “الطاس”.
واش هادي بداية النهاية ديال ملفهم اللي كيبان بلي مبني على “الرمل”؟
غدا في الندوة غادي يبان واش عندهم “الصح” ولا غير “الضحك على الذقون”.
أخبار الإقليم